妹妹的中文作文測驗
上個禮拜尾同今個禮拜頭兩日，係我兩公婆既惡夢期，因為係兩個女測驗既日子，放左工食完飯必定要捉住佢地溫習。哦佢地、氹佢地、逼佢地、利誘佢地、鬧佢地... 乜橋都出齊。
妹妹唔同家姐，不嬲都好難坐定定，佢唔單止出人意表既主意特別多，運動仲好醒添：俾老師揀左入田徑、劍擊、同埋乒乓隊。但係佢既中英數常四個主要學科就認真危危乎，老婆成日擔心佢第日會升唔番自己間中學，同家姐分開... 上面我話係惡夢，係因為周不時我地用盡百般智慧都幫唔到佢，反而被佢激到失控之後對佢又打又鬧，攪到佢成泡眼淚，淚流滿面之後先入房訓覺，我地兩個就要坐低透過禱告將佢交俾上帝，老婆又或者會因為咁無晒辦法，為佢祈禱祈到喊... 個種無奈同激心既感覺真係好難用筆墨形容。
擒日學校派番份卷，妹妹份中文作文卷條題目係咁既：
在你遇到困難時，誰曾經幫助你，令你非常感激她/他呢？請你寫一篇不少於150字的短文，記述這一件事情。〔條題目值20分，限時卅分鐘完成〕妹妹作左篇文係咁樣寫：（放心，已經正式獲得妹妹授權刊登。）
我最感激的人就是我的家人，為甚麼我會感激他們呢？我告訴你吧！好，大家認為應該俾幾多分佢呢？俾你諗一陣...（有意見既不妨寫低閣下既comments）
首先，我感激的是我的姊姊，因為她會？〔呢度空左一個字位，佢應該係想寫個「教」字〕我做功課，也會幫我溫習。
第二，我要感激的是我媽媽，因為她上班，？〔呢度又空左一個字位，應該係想寫個「賺」字〕錢，我和姊姊才能讀到〔跟住呢度佢寫左學校個全名，成十二個字咁長！〕小學。
第三，我要感激的是爸爸，爸爸最特別，為甚麼？因為爸爸下班大約是十時十分，但爸爸想睡覺的時候，他都不會睡。因為他教〔咦，呢度又識寫個「教」字wor...〕我做很難的題目。有時他會罵我，也會用籐條來打我，但我知道為甚麼要這樣做，因為他疼愛我。
我真的感激姊姊、媽媽和我愛的爸爸。
老師俾幾多分我唔開估住，但係我估佢俾既分數係根據以下既諗法：
「車！第一段明顯係妳慣用既「軛」字數招式；另外我叫妳寫一個人一件事，妳就寫三個人同三件事，題目都答得唔準，點俾高分妳嗟！？」
至於我... 等我用我慣用既觀察＞分析approach黎評分：
(1) Going beyond：老師叫寫一個人一件事，妹妹就寫夠三個人同三件事，正正就唔係我地話D學生成日淨係識做夠就算，唔會做多D，going beyond老師既要求，俾D surprise老師，係值得讚固wor！諗下第日佢出黎社會做野，老細叫做一，阿甲就只係做一，唔會諗下一步，阿乙就做定埋第二，諗定第三；你係老細你會請邊個？
(2) 有結構有層次：作為一篇完整既文章，層次同結構都好重要，而妹妹呢篇就贏晒。第一段唔係「軛」字數，係引言。我地點可以當睇篇文既人知到條題目係乜呢？試諗下篇文如果無第一段會點？引言之後既三段，妹妹多謝既人，由細至大、由年紀細至年紀大、由女到男、由佢見面最多到最少、由外在到內在、由微觀既實際層次（做功課）到宏觀D既實用兼政治正確到不得了既擦鞋層次（有錢讀到老師妳呢間學校），再到窩心到絕頂既心靈層次（老豆既督責反映出佢背後對自己既「愛」（最後呢個字加D回音，唔該！））... 最後一段齋用一句，就能夠俾呢三個層次再黎conclude一次，亦係我認為最「正」既層次感就響呢句個度：由頭兩個「感激」，推演到第三個「愛」呢下野！妹妹，爹D佩服到五體投地！無野講！哈哈！
喂！卅分鍾寫到篇咁既文，仲想點呀！？妹妹，爹D俾妳90分jet（妳有兩個字唔識寫，所以要扣少少），另外加送一啖... 啜！〔響正常情況，妹妹會即刻出橋手，打橫放正響我條頸喉核個位，隔開我伸到長一長兼帶少少口氣既咀錫埋佢度...〕
posted by ablogaday @ 9:55 PM
5 comments
