「我餓死唔關我事！」

事緣係妹妹晏晝個餐無乜食野（浪費左起碼半餐飯既食物，慣架啦！），食晚飯個陣又訓著覺（鬼咩，晏晝玩到攰賴賴，工人想叫醒佢都梗發脾氣！又再浪費多D食物），夜晚又話唔飲奶 —— 妹妹做乜都係睇心情，唔會理後果，係典型既後現代一族。好勒，到工人訓左，個個諗住上床訓個陣佢先黎話肚餓，我同老婆唔駛傾就已經企埋同一陣線，乘機把握住呢個機會黎教訓下佢。唔係第一次架啦，今次就等妳捱下肚餓，知道食野唔係淨係睇自己當時既心情想唔想食，唔理有無浪費食物同人地整食物既心機。點知轉個頭就見到呢張紙仔擺響我地間房... 媽咪見到當然忍唔住笑，仲即刻羅妹妹D舊相出黎，睇下佢其它D攪笑野。

我都估到架啦，張紙係家姐代筆既！因為妹妹自己唔會適寫呢D野，只係識講；其次係妹妹D字無咁醜怪，家姐就好平常！

妹妹手字（右）不嬲都好靚好整齊，家姐就寫到好似打風咁（左）。

Anyway，呢張紙仔仲說明左幾件事：

一·兩姊妹唔同意爹地媽咪既做法
二·妹妹仍然未知錯，照例發揮佢既強項：將自己既責任推得一乾二淨，乜都唔會關佢事
三·家姐最錫既始終係妹妹，因為佢不嬲都不分是非，總之一定企響妹妹個邊撐佢，今次仲幫佢寫埋呢張抗議便條

仲有既係：唔知係咪家姐睇爹地個blog睇得多，見到爹地響度可以舒發咁多感受，所以亦漸漸慣左用文字表達自己。