起來！前進！——回歸十週年紀念blog

俾一樓一問候，唔寫唔得啦... 又真係，原來上次返黎自己個blog度打掃，都已經係十日前既事！要各路網友響過去呢兩個禮拜（一樓一講得誇張左D，話我成個月無寫野喎！）摸門釘，謹此致歉！上一篇blog個題目係《放多一日假》，對各位黎講就好似放左兩個禮拜咁，sorry！

等我都黎寫番篇回歸十週年紀念blog先：

我響回歸日成日諗住既，就的確係我地偉大祖國國歌既呢幾句歌詞：

　「起來！不願做奴隸的人們！...
　　起來！起來！起來！...
　　前進！前進！進！」

係咪好鬼愛國呢？

老細響上個禮拜尾突然間話要響禮拜二下晝上杭州做個pitch，禮拜四放工前briefing，講左一渣野，連同幾段英文字，我要將佢零碎既思緒重新組織，用靚靚既全簡體書面語寫番出黎，變成圖文兼備既PowerPoint project proposal。我心諗禮拜五做夜D，禮拜六就算去遊船河，禮拜日返完教會返屋企做一個晏晝send俾佢睇第一稿，禮拜一繼續做繼續改，禮拜二朝早返工finalize埋佢，時間都應該OK。

遊船河呢日係英國佬結束統治香港十周年，我著左呢件十年前買既T-shirt做紀念。十年前今日落雨，十年後今日落狗屎！十年前彭定康著住西裝淋住雨喊住口攊住張濕既國旗上船返英國，十年後我就著住件濕晒既紀念T-shirt！

全身濕透上左隻遊艇之後個電話響左幾次先聽到，原來係老細打黎無人接聽，落左個voicemail，佢好有禮貌咁問我個PowerPoint既進度點。咁既情況梗係要覆，佢話俾我知佢唔係禮拜二飛，係二號飛，而且因為要響深圳飛，所以個PPT必須要響二號既朝早十點前finalize！

無既，幾十歲人咩未試過jet？繼續遊埋個船河到十點，同老婆兩個女飛的返歸，攪掂埋佢地沖涼訓覺十二點幾一點，自己即刻訓養足精神禮拜日早起身開工...

無辦法啦，崇拜返唔到、義工同工分享會參加唔到，要留響屋企趕工。好在老婆同兩個女都有地方要去，我可以專心咁做快D。呢日除左兩餐落街之外，其餘時間都係做做做。傍晚六點同夜晚十一點俾左兩轉老細望，文字方面大致OK，之後既工作都主要係搵圖，scan圖，加圖... 做呀改呀，呢句歌詞就越黎越清楚：「前進！前進！進！」... 一直做到半夜兩點鐘卒之頂唔順，達落梳化洽一陣先... 較左個鬧鍾兩點七，但係響左都唔係好想郁，D歌詞就繼續黎：「起來！不願做奴隸的人們！... 起來！起來！起來！... 前進！前進！進！」究竟我依家係工作既奴隸定係睡魔既奴隸？三點鐘終於戰勝睡魔，起身洗個面刷過牙繼續...

五點零天光啦！不過個月亮仲係大大個清澈可見，加上擒晚落左兩場雨D空氣無晒煙霞，好靚！即刻影低佢先，不過影出黎capture唔到當時個mood，個月亮細咁多既！？

九點鐘終於攪掂啦！可惜個PowerPoint file最後用左成90張圖，有13MB大，email唔到，壓縮又唔細得幾多，亦都無時間擺上網俾人download，索性斬開兩件再email，九點半大功告成，老細滿意收貨（其實佢都無時間唔滿意，要趕住搭車去深圳機場）... 啊欠！

既然又即刻訓唔到，於是攪醒兩個女。大女唔肯起身，如常賴床，細女就自動自覺起身（呢樣係佢一大優點）—— 既然咁乖就等老豆同妳去麥記食早餐啦！他他條條同家人一齊食早餐永遠係我最響往既生活，家陣直落做完一日半至食就仲覺relax！食完早餐，漢堡飽氣同奶茶氣攻心，動作開始變得緩慢，唔好意思... 啊欠！我真係要停一停訓一訓勒，各位！

ZZZ... ZZZ... ZZZ... ZZZ....