為誰辛苦為誰忙，我要做好呢份工！

喂！講工作講到爛啦！仲講？真係仲有得講，鬼叫我地講黎講去都無辦法擺脫響份工捱打既狀態咩？香港人份工大過天架麻！

Mmm... 既然講黎講去都係咁，咁唔爭在講多次啦可！理鬼佢成日都係same old story...

一日我地無上帝既呼召做全時間既傳道人，我地都只會係24小時既帶職事奉者，咁既話工作佔左我地大部份時間其實無咩唔正常，問題只係我地既心態係咪帶職事奉，定係既要白白領受福音又要賺取世界jet。唔駛做就有永生，於是用多D時間黎賺多D錢，係咪win-win？

傳統既福音派信仰不幸地將好多野（包括事奉）「諾斯底」化左（記唔記得查約翰一書實會講下「諾斯底主義」？）：乜鬼野都將佢二分法：唔係屬靈就係屬世。「上帝是個靈」，所以屬靈就實係神性既、係永遠既，係我地應該竭一生既精力去追求既；相反，屬世既物質世界就係罪大惡極既，係我地應該屏棄既... 慢慢幾乎淨係得番讀經祈禱傳福音同返教會先算係屬靈，工作就唔駛問梗係屬世。唔係咩？你賺埋賺埋D錢一個崩都帶唔到入棺材架麻！

其實主耶穌由細到大做左起碼廿年木匠，出黎傳道就之不過三年咁大把，保羅就不嬲都有靠織帳棚賺錢維生（徒十八1-4），佢地從來都無話返工唔屬靈。將自己份工做好肯定唔單止係曾特首既心意，都係上帝對我地每個帶職事奉者既心意。上帝響暗處察看我地做野係用咩心態，係咪對上司同老闆盡忠，服事人如同服事主（哥羅西書三22-24、彼前二17-21、提多書二9-10）。如果返返下工唔做好自己手頭D野，淨係掛住捉住隔離個未信主既同事講人生既終極問題，話耶穌先係呢個問題既答案，咁就只會整衰主耶穌個名，好心做壞事。

所以我認為講黎講去都係兩個大原則：

（一）用負責任同追求卓越既心態做好自己份工，不過唔單係為左老闆同公司好，而係為左我自己既為人，做唔做到一個負責任既staff。呢樣野唔關信唔信耶穌事，係做人既基本態度。

（二）用最大既努力維持一個均衡既生活。呢樣野都唔關信唔信耶穌事，都係做人既基本態度。我講緊既唔單止係話對信耶穌既人黎講，信仰生活一環會係有較高既priority，而係我地應該將我地既信仰融匯貫通，融合響我地24小時既生活裡面。如過你24小時都係靈修緊，咁既話就算俾你直踩24小時都要工作，咁樣做基督徒又有咩唔妥？直踩24小時，一路記住神既說話，諗下點樣響份工上面實踐出黎，搵岩個位將神既說話身體力行做出黎，你條命就變成一個活生生既見證，點都唔差得過喱埋響個山窿度禁食祈禱嗟下話？（呢拿！一咁樣比較邊個屬靈D，其實又係將個信仰「諾斯底」化左勒！）換句話講，維持呢個均衡既生活，係從精神思想上開始：個腦唔係淨係俾賺幾多錢、買乜野點樣洗、幾時升職幾時退休等等呢D野霸晒，而係要俾聖靈霸左先，俾佢做主，然後諗下等陣俾著耶穌，佢會頂硬上唔放工住、繼續直踩做好自己份內事，定係唔理老頂威脅炒魷一於收工，返屋企見阿爸阿媽老公老婆仔女定係返教會。個個處境未必一樣，個個情況主耶穌既選擇都未必一樣。

信得過神，你會信得過如果你繼續開OT，佢會睇住你阿爸阿媽老公老婆仔女同埋教會。

信得過神，你會信得過如果自己堅持收工，佢會保住你份工同埋你既前途，或者就算真係俾老細炒左，佢都會俾番另一份你。神未必下下用神蹟，但係結果就往往出人意表！

無論點揀，重點係我地信神定係信自己或者信老細。信神既話你點揀都會經歷到佢既保守。信自己既話你點揀都會覺得自己做得唔夠好，平衡唔到，於是成日都要孭住D罪疚感。返工又內疚，放工更加內疚。

為誰辛苦為誰忙，你諗下勒。諗諗下次你會點揀？