Day 6-10, London: 兩個無奈

大笨鐘、紅噹噹既倫敦雙層巴士、Tower Bridge... 呢幾幅相係想用D地標黎話我地到左倫敦啦！

不過我地飛到倫敦、響Heathrow大排長龍過海關、坐Tube黎到市中心已經係夜晚十一點幾。拖住兩個差不多超重既大喼，揸住地圖行左十零分鐘，搵到一早響網上邊booked左既 LSE宿舍、checked-in、入房安頓好，已經係半夜十二點！呢D對我黎講都唔係問題，一早預左，但係估佢唔到既係居然上唔到網！有線無線都connect唔到... 太太不嬲都話我用電腦同上網既入迷程度已經變左病態（你問我我梗話唔係，飲醉左既人通常都話自己無醉...）。佢話家陣我地兩個一齊旅行，咪掛住攪機同上網，我唯有乖乖地就範，此乃一大無奈！（之後個幾日去到邊都靜靜雞用部iPhone睇下附近有無免費wi-fi，有就即刻上網同check email！同上次一樣，寫完D肉麻野要寫番D同老婆唔係完全「岩啞」既野平衡下...）

響倫敦訓醒教第一日岩岩係星期日，響間房有張宣傳單張知道學校裡面有崇拜，於是膽粗粗同老婆走去參加人地D鬼佬崇拜。廿零人大概都係響LSE讀緊書既，有D已經結左婚仲帶埋D鬼咁得意既手抱BB同小朋友黎聚會。有隊五人band響個台度唱D Hillsong風格既敬拜詩歌，班會眾都有D舉住手一齊唱。個日呢度個pastor同請返黎個講員都咁岩係卅零歲、大家都著住lumberjack shirts同牛仔褲。起初覺得個講員好快同好重英格蘭口音既英文有D難聽，但係聽左五分零鐘就慣左。佢篇道個主題係《盼望》，個引旨係用自己身為英國人對自己國家足球隊響好多次世界盃同歐冠盃都抱住好大期望，點知一次又一次飲恨... 最後篇道以喚起班會眾響呢個社區委身見證耶穌為終結。覺得幾得意既就係個講員一路講，班會眾會好踴躍咁用「Yeah!」、「Amen!」、「Right!」之類既說話和應。

The biggest challenge that any of us will ever have: to really get up in the morning and say, "OK God, what can I do to help somebody else today, how can I be a blessing to somebody else?" ~ Joyce Meyer

文化唔同，D歌其實好聽但係我同老婆無首識唱，成個崇拜真係無乜feel，此乃第二個無奈！好彩... 唔係，應該係感謝神至岩：響最後重複唱一首講神賜我地力量克服萬難既回應詩歌稍為投入到。當個pastor邀請個D想人幫佢代禱既會眾出黎排隊俾佢按手祈禱既時候，我諗起教會既一位弟兄，心裡面就幫佢代禱...

我地住間LSE宿舍響市中心Covent Garden站附近，方便頂透。淨係隔離既Covent Market都已經勁多野睇：坐響D露天餐廳同茶座睇街頭表演已經好寫意。

上次遊倫敦已經係廿幾年前同阿爸阿媽黎，仲記得當時個大笨鐘俾布遮住維修緊，今次就睇得一清二楚。

隔離間西敏寺都翻新過。我地兩公婆都覺得佢大門口側邊間souvenir shop賣D野好靚。

讀完大門口呢段咁有意思既禱文，心裡面不禁講句「阿們！」

正門同西側門一樣咁有氣勢。

倫敦有咁多值得參觀既野，一定唔夠時間睇晒，點揀呢？除左睇駛唔駛錢入場同順唔順路之外，我既方法就係遊一次船河速覽一次，再篩選邊D落地行路睇：同老婆坐船遊泰晤士河，一路都好多著名既地標：除左大笨鐘同國會、Norman Foster既作品集（大會堂、千禧橋、瑞士銀行、Willis Building；by the way，Norman Foster係設計我地香港赤鱲角機場既建築師）、仲有復刻版既莎士比亞劇院、White Tower... 當然仲有條係人都識既Tower Bridge...

翻新緊既外牆好靚！俾錢既話仲可以上去睇展覽同遠眺河景。

唔單止係D建築物，其實停響條泰晤士河兩岸同中間好多艘船都好有來頭，包括響二次大戰打過仗既HMS Belfast號戰艦，都係一間戰爭博物館黎！

St. Paul's Cathedral係我其中一個幾鍾意既景點（逢教堂我都鍾意睇），所以點都要搵條路帶老婆特登經過。不過唔同上次同阿爸阿媽跟團黎，就係今次黎到發覺要俾錢先可以入去參觀，梗係睬佢都傻...

響外邊影下相同兜下算數。

沿住Peter's Hill經過啡紅磚外牆既City of London School，一路都仲會見到教堂既雄偉外貌...

向前一直走過條千禧橋橫渡泰晤士河，就係South Bank同頂頂大名既Tate Modern現代藝術博物館。就算老婆無興趣我自己都要行一趟，因為廿年前係無呢座野既！雖然我好匆忙係咁咦睇左兩層，已經印象深刻。上頂樓睇返過河對面既St. Paul's Cathedral，一樣咁壯觀！

雖然就唔岩時間睇換班儀式，都無理由唔過黎睇下聞名中外既白金漢宮... 既御林軍！

邊個有型D？

個日天氣同陽光既方向麻麻，影D相唔靚，反而門前個維多利亞一世像仲吸引。

話晒響皇宮側邊，個Green Park度大閘靚過人都好應該。

咁大個公園有排散步，坐下抖抖先。後黎有條友走埋黎，話要坐就要俾錢！咁咪起身走人lor！

女士們黎到倫敦，你話有無可能唔去Harrods呢？呢間超大既百貨公司，老婆仲去左兩次添！家陣雖然只係九月，已經有Harrods既自家聖誕節貨品賣啦！買左隻2009年版Harrods聖誕啤啤熊，打算送俾兩個女... 既表姐，多謝佢響我地兩公婆外遊既時候幫我地湊兩隻馬騮。

日日都係坐地鐵，即興試下坐巴士，架巴士OK乾淨同埋新。由Harrods坐去Piccadilly Circus不過五分鐘。

個個睇見呢張相都話諗起澳門既威尼斯人... 威尼斯人邊有咁靚呀！？

唔爭在去埋唐人街啦！老婆睇見D唐餐館既菜牌口水都流埋！

無相放上黎不過又洗左錢做既，就係去London Palladium睇左場musical。我地揀左《修女也瘋狂》。由於張宣傳單張話明係「Whoopi Goldberg presents」，以為一定會唱電影版個幾首歌，點知無一首相同，全部都係重新創作。但係唔緊要，一樣精采絕倫！爭D想即場買埋隻原創音樂CD。歌、演、佈景同服裝設計樣樣都好，坐響我地後面兩個上左年紀既日本女士除左笑到拆天，仲high到拍晒手咁和住台上邊D人唱歌。

倫敦，世界頂級大都會，係無可能響幾日之內玩晒既，希望有再黎既一日...