你有壓力，其實我都有壓力

哎！小丸子響崇拜擺我上檯，話搵勻全教會平信徒黎講論最熟聖經就非我莫熟咁話喎 —— 喂！呢鋪我真係有壓力勒！因為我其實「仲有好多進步空間」（引用番小丸子話可以咁樣俾人地善意既批評）。我其中一個對退休既幻想，就係留響屋企睇番晒我以前買落、但係依家放左響書架上面封塵既屬靈書、神學書、聖經註釋書... 真係有排都未追到阿麥醫師同榮恩弟兄佢地咁熟聖經啦！唉！有壓力！

不過話時話，又唔怪得晒小丸子既，有時分享D開心野或者威水野，老婆都會話我會唔會響度太show-off？唉！有壓力！

仲有，禮拜六同一個舊同學飲下午茶（好耐無試過可以咁輕鬆嘆紅豆冰，兼且係無目的咁齋傾偈！），佢都話我寫D野實在太正面（唔知佢意思係咪話對於個D響信仰上有好多軟弱同爭扎既弟兄姊妹黎講，我咁寫會唔會好似太高不可攀，將自己position得太屬靈？樣樣野話自己係有choice屎、有得揀...），所以或者會令人難以有共鳴... 唉！又有壓力！

「因為高抬自己的，必要降卑；自己謙卑的，必要升高。」∼路十八14

係咪我自己無經歷負面既野呢？唔駛講梗唔係啦！我只係一個極其平凡既人、無「佳形美容」（賽五十三2）、近乎雙失、開始面對中年危機、自尊心亦都開始變得脆弱、第日可能無得撈要做送稿阿伯都唔定... 只不過係考慮到internet係一個公共空間，好多野的確係不便響呢度講（我用既Blogger系統除左spam filter之外就沒咩security measure。但係呢種簡單性同佢既平面設計介面亦係我選擇佢既原因。）... 兩個女咩？我都有問佢地介唔介意架。響度要show-off我仲可以繼續show（下面我會show-off多一次），但係要講軟弱就更多野講，a blog a day都未必夠...

不過，我有一個諗法，係解釋點解我多數寫埋晒D正面既野：聖經話我地基督徒係響世上寄居既「客旅」（彼前二11），活響世上就好似「一台戲」（林前四9），有D叫好叫座、有D叫好不叫座、有D叫座不叫好、有D就既不叫好也不叫座。上帝俾我份劇本係點我真係唔多sure，但係我會盡力演好佢，好多自己唔能夠控制既主觀客觀因素就無辦法... 你估我唔憂柴憂米咩？你估我同老婆無拗撬咩？雖然成日口甜舌滑，但係你估我無令佢失望傷心過咩？你估我唔激兩個女氣，失控無情情發佢地脾氣咩？你估我做野無受過冤屈咩？你估我無控制唔到既壞思想咩？你估我無自我中心咩？你估我無做唔到free man既時候，俾人支配左我既情緒反應咩？你估我無對有需要既人冷漠到當睇唔到咩？我有晒呢D衰野之餘，有番小小好野仲會即刻諗下點樣show-off下添！總之，你有壓力時我一樣有，而且一定唔少得過你。曾經教會既前主任牧師幫我做過一個壓力測驗，結果我既壓力指數真係爆晒燈！但係弊就弊在我對住人仲係成日笑口噬噬 —— 但係我唔係扮出黎個播，呢樣野如過唔關俾我自由、平安同快樂既上帝事，我就真係諗唔到第二個自圓其說既原因勒。響呢個充滿壓力、焦慮、失望、悲哀、同打壓絕對真理既後現代社會裡面，我覺得如果自己寫既野再俾睇既人黎個落井下石，或者用自己既軟弱無助黎double人地已經有既擔子，就真係累鬥累無乜意思同出路。但係如過自己揀過黎寫，有D私人野講左出黎，將佢透明化，可以成為人地既鼓勵或者上帝因為咁得榮耀既話呢，就真係無枉我花左過往既時間寫咁多野勒。係呀，呢樣野無我著數架！就算羅晒自己既時間黎做斗零都賺唔到架！

所以無格，寫埋寫埋，我一樣係好似個D有個blog就以為自己係個專欄作家既無知少年咁，收一兩個鼓勵讚賞既comments，就即刻鬆毛鬆翼，繼續懵剩剩為呢D小眾讀者埋頭爬格子。拿，下面係一個demo，係一個響海外既舊同學send俾佢教會D弟兄姊妹，cc俾我既：

Remember way back when we were in the design school, we (myself and those non-Christians) laughed at him when he prayed before his meals, teased him for spending too much time at church... And now I enjoy every piece of article he wrote!

Patrick, this is a special thank to you following our Lord for so long and serve Him wholeheartedly.

拿！係咁寫岩架啦！係咁咦寫幾句我就會繼續演好上帝俾我份劇本過你睇架啦！

拿！我咁大壓力，原諒下我咁耐先有新野寫啦！

-----
無追世界盃，不過星期六晚同伉儷小組班老公同小朋友一齊tip四強，我既預測係阿根廷、烏克蘭、葡萄牙、巴西。隔左兩日已經有三個出局，我仲未！