樂做送稿阿伯

個邊廂學子用Josef Muller Brockmann同港式切雞人比，有乜辦法唔俾佢打沉？莫講話Brockmann、Erik Spiekermann、定係田中一光（襯機數晒自己景仰既typographers出黎）、就算只係康港自己出產既蔡啟仁都無諗過會比得上。咁岩前幾晚有個都係做設計既舊同事話我知佢響佢公司同個account servicing既同事頂左幾句之後，響三聯書局「laap」完建築設計既書之後，無意中睄到D哲學書，對人生又忽然好似學子同reply佢班人咁，起左一種慨嘆：一團設計火成日都燒唔著，好似壯志未酬（話時話，「酬」定係「籌」？上網都check唔到）咁...

想個世界（至少康港）變但硬係唔變，或者唔係自己想咁樣變，的確係幾無奈...

呢邊廂一樓一響自己個blog講起舊屎，字裡行間散發出黎既唔係臭味，係一種無奈。皆因以前 「出五分力就有十分回報」，而家就手停口停（手唔停都唔夠開飯就唔好講啦！）... 我明你講乜架！大家都經歷過事業上既艱難日子...

想個世界唔變但係又變左，又係另一種無奈...

原來無奈唔在乎未得到或者失去左，係在乎我地用乜野態度面對世上既轉變。如果個地球係度轉而我唔肯轉，執著某D事物，無奈痛苦就隨之而黎。轉變本身其實係中性既，即係話唔好將D無奈同痛苦賴個世界或者上帝。好多人見個世界變好左又唔見佢多謝上帝，反而覺得係自己功勞；變衰左或者變得唔岩心水，先至會怨天尤 人。應該問下自己點樣面對呢個不斷變既世界，或者唔係依住自己心意變既世界，個種態度恰唔恰當（注意上帝已經俾左我地自由去選擇用乜野態度面對轉變！）。 如果選擇堅持自己個團火或者選擇堅持懷緬昔日既光輝歲月，咁對住要變或者唔變就要硬食架啦！

上帝造呢個世界係充滿生命，係一個有機體，不停咁變係佢既定律，唔會靜止落黎，唔係上帝駛乜分派我地人類好好咁管理個大地（參創世記一章28節）？知唔知organizational change或者managing changes係MBA既專門學科黎？明白個世界根本就係變幻無常既，我地就唔會輕易因為一D我地接受唔到或者唔願接受既轉變而埋怨同歸究上帝，兼且覺得無奈。阿虫有幅畫咁寫：「任教風雷頭上起，看透無常是正常。」呢個秘訣幫我地係百般唔願意既痛苦同無奈中重新企番起身，丟左D消極既態度，發現可以點樣將人生既無常轉化成令自己更加成熟既機會。阿虫仲有另一幅畫咁寫：「橫逆風雨來，張傘擋不了；解衣赤膊行，我嫌雨點少。」

岩岩收到婆婆新寫篇journal個alert email，首歌詞好岩駛，就借黎用下（唔係個個可以睇到嘛！）：

《普通的人》∼陳芳榮

像那小男孩的餅和魚，讓我獻給主
就算多寒微，衪不介意，全盡我心思

無論是多少，全是不緊要
在我主手中，一切也奇妙

在這一世裡，不管錯對，讓我再奔跑
就算多平凡，都不計較，神是我倚靠

人若逆風上，能力多牽強
憑著主力量，衪給我保障

（副歌）是個普通的人，沒有可誇口
　　　　但我什麼都有可能，神在我背後

奉獻我僅有，神大愛深厚
欠缺裡沒有還是夠（那怕我沒有常足夠）

隨住年紀大左，我越黎越體會到人生既滿足，並唔係黎自自己做緊設計定係切雞、五分力換十分回報或者十分力換五分回報... 而係響件事上有無盡過力，過到人過到自己之餘，仲有無過到上帝？我拿住五餅二魚盡心咁整餐飯出黎就以經OK，可唔可以餵飽五千人就係上帝額外既恩典，俾唔俾既主權係上帝個度；就算整左呢餐飯連自己都餵唔飽都唔駛洩氣灰心兼無奈，個point係盡心整左個度ma！上帝睇到格，佢今日無俾你食飽，就即係預備左D仲正既野第日補償你，個種滿足唔單止會係肚腹既滿足咁簡單。響當下呢一刻我已經盡心盡力，上帝appreciates，就已經夠晒。

唔甘於平平凡凡，普普通通咁過一世，就要睇用乜野標準。做到好似Josef Muller Brockmann咁梗好，but it's your life! 都唔係做俾人睇既。最緊要係自己一世人有無賺左，上帝又點評價我一生，會唔會話我係「又忠心又良善既僕人」（太廿五14- 30）？

唔好講到咁屬靈咁崇高啦，後現代最鍾意講感受講開心，開心咪得lor！我第日有錢有女婿養（希望兩個女嫁個錫佢地既有錢人啦...）既話就可以去神學院，好似Tevye咁進修下聖經，無錢咪學下個弟兄呢埋響屋企讀lor！

（車！你估你實有錢淨，有得退休，好似絕世高手咁銀銀腳架啦？）

都曾經同一樓一傾過，大不了做送稿阿伯?！舊屎自己係studio打工個陣，見送稿黎個D阿哥、阿叔、同阿伯都不知幾多野講：呢位阿哥話佢點樣戰勝癌魔、 個位阿叔又可以同一樓一研究下馬經、呢位阿伯又話佢D仔女不知幾孝順，帶佢去旅行幾咁happy... 呀，記得啦！仲有個位送smartjet黎既阿姐，佢每次送完稿梗搵阿Uncle Mike嗲幾句架啦！我見佢每次黎個樣都好開心既...

其實廿幾年前出黎做野，都預左自己呢行未必會做一份工做到有退休既一日（做到身心頂唔順就大把機會！），所以晨早買左份有退休保障既保單，加埋呢度做下個度做下既濕濕碎強積金，希望唔駛lor埋黎供兩個女讀書，第時可以同老婆慢慢搣埋佢，同諧白首...

「我 在主裡大大地喜樂... 我並不是因為缺乏才這樣說：我已經學會了，無論在甚麼情況之下都可以知足。我知道怎樣處卑賤，也知道怎樣處富裕；我已經得了祕訣，無論在任何情況之下，或 是飽足，或是飢餓，或是富裕，或是缺乏，都可以知足。我靠著那加給我能力的，凡事都能作。」∼腓立比書四章10-13節

一樓一，唔駛無奈，舊屎沖左落屎坑幾唔閒?，你仲有得呵架嗎！？