開夜睇功課（唔係做功課！）

咪以為淨係做野讀書做功課、或者去旅行公幹前一晚執行李先至須要開夜無得訓覺，勢估唔到原來幫兩個女睇功課都可以成為要開夜車既內容！係咪發夢都無諗過呢？

由晏晝教書直落六個鐘到夜晚十點幾先至返屋企，通常就淨係見得兩個女兩眼，講得句good night就要逼佢地入房訓，食埋晚飯就起碼十一點半！前一晚趕畢業論文就已經成三四點訓（未做起添架！），諗住擒晚可以早D訓補番數，點知老婆話仲有兩個女D功課未睇！咪問點解佢唔可以睇，其實老婆放左工到我返屋企，同我一樣都係未食飯，皆因要同兩隻野溫書for今朝早默書。陪佢地溫書同默到識為止就已經勁gui架啦老友！所以睇功課就留番比我啦...

咪以為睇功課係一件hang-kang既事bor，隨時攪你兩三粒鐘：每日兩個女會將要做既功課寫晒係本手冊度，你就要逐樣幫佢地go through，睇下有無做漏做錯，跟住又有一疊通告要睇要簽，唔淨止，其中一兩張就要麻煩你開埋張cheque跟埋一氣，一陣話要買乜野書、一陣話去旅行要俾車錢... 記住以上所有野都係雙份（兩個女嘛）！試諗下張張cheques都要寫佢地成12個字長癩癩既學校名做抬頭，就擒晚咁計一共開左三張cheques，淨係寫D抬頭都成36個字，仲要大寫個銀碼、每張cheque背面又要寫番係乜事幹、個女既名、班別同號數... 你話對我呢個慣用電腦輸入既人黎計，係咪寫到手都gui埋？而家我寫上面咁多字都唔駛咁耐同咁gui啦！

以上既都未到戲肉！睇睇下頂唔順啦，攤係張梳化度訓著左（前晚訓左四五個鐘咋！）... 擘大眼（其實根本擘唔大）已經係半夜三點幾，D功課都未睇完... 唔係啦，都係沖個涼先，希望可以精神D再睇埋佢... 沖完涼，好，的起心肝睇埋佢（寫論文都無咁好意志力）！Lor隻西班牙頂級鋼琴家Maria Joao Pires既《Nocturnes（夜禱）》獨奏系列出黎伴住睇，果然無靜英英咁悶。兩隻野照例都有D野未做未攪掂或者做錯，或者有D書無話到俾媽咪知要溫 —— 都係聽朝要默bor！大鑊啦！咁即係我要早D起身係佢地未返學之前（即係六點幾）同佢地溫埋佢？咁咪即係我仲要訓少D？咁咪即係聽日返工又試嗚下嗚下？擔高頭望下個鐘已經五點咯bor！個肚又有D餓添... 唔理啦！個零鐘係梳化訓埋佢算啦...

以上呢D唔係埋怨，除左話俾大家知我既time management有幾差之外，只不過係想大家知道為人父母會係點樣為自己既仔女付出?！我呢D只係濕濕碎，算得乜？大把父母偉大過我不知幾千倍！做女既睇完記住返屋企錫番阿爸阿媽一啖，做仔既，都可以攬下佢地兩老啦！