俾面派對（二）

雖然話係兩個女成日嗌住話要去迪士尼，但係黎黎去去都似係老婆想去多D（好啦，我知佢都係想?兩個女開心嗟，但係似乎另有原因...），放親假都話「不如今日去啦！」仲擇日不如撞日，突然訂左四張飛響禮拜六去。

好啦，廢話少講。星期六晨早參加完俾面派對（一），返屋企食過午飯，馬上出發！

搭地鐵東涌線同迪士尼線既一路上，妹妹都顯得非常興奮。到站時佢本來跳出車門就即刻想出閘，如果唔係老婆話要去廁所，我都影唔到呢張相。

一家人決定由裡面玩出黎，所以先坐火車入樂園既另一端開始。響「Fantasyland」個站一跳落火車，妹妹就唔理三七廿一見到乜就即刻話要玩，首當其衝既就係對到正個火車站既Cinderella Carousel勒。

家姐就好少理，寧願先排隊同佢最鍾意既Minnie影張相... 排排下突然間米妮話要行開下補補妝（我諗其實佢係想去?所！），叫大家等佢兩分鐘，家姐都好樂意等.... 到個妹玩完個merry-go-round，我同佢都仲係排緊，但係佢都無怨言，仲係好開心咁繼續等... 最後到佢影既時候，佢特登lor埋個裝八達通既Minnie袋出黎俾正牌Minnie睇，Minnie見佢咁有誠意，走之前仲咀左佢一啖。大女既表情一句講晒，滿意！

-----
Sorry！以下呢部份可能太驚嚇，所以無相。咁勒，就由大女現身說法，整篇「趣味寫作」你嘆：

《迪士尼怪談》

　　你見過小朋友玩迪士尼樂園的機動遊戲哭嗎？我前天看到了一個，她就是我的妹妹！因為她玩完「飛越太空山」之後，她很驚慌，出來的時候，她說她以後都不會再玩這個遊戲了。

我睇見妹妹響漆黑既太空返出黎既時候呆若木雞，乜都無講，就諗呢次會唔會成為佢將來既童年陰影呢？

一人黎一個香吻，預祝媽咪生日快樂！（會唔會呢個就係我上面話既「另有原因」呢？）

一家人一人整左一個薯蛋頭，眼耳口鼻同手腳配搭就個個唔同。就黎張另類全家福啦！左起daddy、mammy、家姐同妹妹。

一直慕名已久既《獅子王》音樂劇終於有機會欣賞！雖然呢個半小時既「樂園版」無論規模、服裝、道具、舞蹈、化裝、同長短等，都比唔上響倫敦上演緊既正牌「百老匯版」，但係製作絕無令我失望，兼且可以話係我今次「迪士尼奇妙之旅」最鍾意既項目。扮Simba同Nala既男女主角，仲有負責講故事既Rafiki，現場唱功實在了得，和音同高音位都零瑕疵！

留番齋睇既「美國小鎮大街」響夜晚欣賞，五光十色得黎估唔到又另有一番風味。條街既夜景都好靚，加埋煙花仲靚到癲！（點解人地D煙花放響上黎無咁多爆炸聲既呢？）跟住我地一家人響「大街餐廳」慢吞吞食晚餐，等D人散晒至慢吞吞行出去搭地鐵，都好寫意！妹妹就一早已經無晒電...

身為康港人，點都要俾面黎消費一次咁話...

Walt Disney之所以起迪士尼樂園，其實靈感係黎自丹麥首都哥本哈根既Tivoli遊樂場。呢個超過160年歷史既遊樂場可以話係至今仍然存在既最大型experience design項目。Experience design既基本原理係要比電影既影音更進一步，多方面咁帶設計用者進入另一個感官同經驗世界。佢要用到既設計技巧，涵蓋左大部份現有既設計範疇，包括graphic communications design, product design, environmental design, user interface design, emotional design, costume design, stage design, special effects design, game design, production design...（you name it!）體驗左設計其實唔係淨係屬於畫畫下個班人，兼且係屬於渣feet個班decision makers。設計如果成為班老細都有既mindset，出黎既產品真係可以好有impact！但係正如Camus前牌講過：天國更美！