病好做過乜

上個blog講到上個禮拜二手震腳震返番工同教書...

禮拜三日頭返工，夜晚教書。

禮拜四繼續返工。九點幾返屋企食完晚飯梳洗完十二點起再開一陣夜，皆因要預備禮拜六一個公開講座。

禮拜五晚響團契帶左個文章分享既週會，討論後現代既X-generation。（對個週會有咩意見都可以響度comment。）十點幾同弟兄姊妹三扒兩撥叫做食埋個晚飯拿拿臨返屋企，梳洗完十二點又一樣再開一陣夜，為禮拜六晨早既講座作最後衝刺。呢個年紀唔係以前，兩晚夜訓少少已經足以令我個頭開始痛。

禮拜六朝早8:30老細接埋我到九龍塘InnoCentre（估唔到第一次去呢度就係講talk！），兩個人conduct個seminar由朝早9:30直到下晝4:00+。人少少既講座除左我同老細講之外仲有傾偈時間，反應算唔錯，但係咁樣直踩你都咪話唔攰！返到屋企附近買左兩件裝麥記脆香雞翼補下個五藏廟，食完即刻上床訓番陣，補番前兩晚唔夠既訓。矇矇矓矓... 岩岩訓著老婆就叫我起身食晚飯勒！

一路食晚飯一路睇《爭霸》大結局，可以話係一家人近幾個禮拜最休悠既時刻！睇住馬德鐘點樣變左披頭散髮（其實幾型吖！）、問西施到底有無愛過佢（演得算係咁啦！記憶中佢應該未試過做得咁好勒）；睇住劉松仁點樣變衰、為左面子借D二誅殺自己人... 唉！臥燊嚐膽既勾踐原來反影左唔少中國歷史既悲哀！

咪以為食完飯睇完電視可以輕鬆bor，一家四口加埋菲傭即刻要開工unpack成個禮拜都無郁過既行理：細路執拾玩具、老婆同菲傭執立雜野、我就執影音有關既野... 攪到半夜成三點先訓！

禮拜日晚會合家人食團年飯之前諗住幫個大女買過對已經殘晒既波鞋，點知揀極都揀唔岩，反而買左對高筒既Converse All Star俾個細女，佢異常興奮，乜病都好番晒啦！