Monday, October 16, 2006

忙裡無閒偷

人地話忙裡可以偷閒,我呢個禮拜就真係忙到無閒可以偷,一直處於唔夠訓既狀態。幾十年黎我唔夠時間做野就梗係先犧牲訓覺既時間,再唔係就食飯既時間都愛埋黎做野,唔知咁算唔算工作狂?不過家陣年紀大都驚機器壞,加上大大個老婆管住(其實我好多時都好硬頸,唔多聽佢支笛),所以都已經錫身左,頭重重就走上床去訓算數,如果唔係都唔駛大脫稿啦!

今日又離港公幹,先至有機會寫番D野,補番幾張相。不過咪以為夜晚實得閒,等陣寫完blog仲要開工幫老細預備個lecture既PowerPoint...

既然無閒可以偷,唯有時光倒流,諗番之前既偷閒日子...

十月六日中秋晚,同老婆lor住個到膝頭咁高,點住陽燭既巨兔燈籠,帶埋兩個女同佢地既迷你電燈膽兔燈籠,落樓下附近個公園回味細個時候街邊玩燈籠過中秋既日子。

響公園都係大人睇住細路玩多。個度有條隧道滑梯,兩個女又點會放過?拿拿臨lor住燈籠、sir住滑梯,玩到唔知幾興高彩烈。

第二日晨早又趷起身去濕地公園,感謝天公天氣奇佳!響公園門口影左呢張相:留意家姐自己走開玩自閉,妹妹就照例發揮佢既social強項,同人一齊影番張靚相。

個訪客中心既建築設計唔錯播,鍾意佢用好多自然光!展覽聽D野老婆無嗌悶,仲話幾好睇添。

Labels:

1 Comments:

At 10/17/2006 10:57:00 PM, Blogger ablogaday said...

多謝會友部精心策劃,今次D景點我相信大部份人都鍾意,攪到有D嫌逗留既時間太短,特別係火車博物館,勾番起好多大人同長者既兒時回憶。

 

Post a Comment

<< Home