HH奪金

上星期二專登請假睇兩個女參加自己學校既運動會，重頭戲係睇HH跑4 X 100米接力賽。由於今年佢俾老師揀左入校隊，幾乎朝朝早返到學校響上堂之前都會練下跑，又要我同佢周圍搵之後買左對有釘既童裝跑鞋俾佢，所以今次特登黎睇下佢可以跑出乜野成績。其實前排都同老婆應HH既要求去睇左佢參加校際100米，雖然個次佢無贏，但係都覺得佢跑得幾快。

叫完最後召集，四個小妮子已經換晒跑鞋準備出賽。睇真D，原來HH對鞋同人地既唔同款。

努力！必勝！我再同佢講，唔好犯上次參加校際時候既錯誤：掛住望人地，記住要專心向前盡力跑；咁樣跑就算贏唔到都唔會俾我話...

HH跑第二棒... 唉！好失敗——我講緊我！因為跑第二棒即係響運動場對面離看台最遠，我部相機就算有10X光學變焦都影唔到D乜，所以無相睇！係咪好失敗！？唯有用文字描述過大家知...

起步鎗聲一響，六條線既運動員即刻如箭彈出。HH接棒既時候，佢個隊大概跑二三啦... 點知枝棒交到HH手上，佢真係好似之箭咁標上黎，第一個將棒交俾第三棒既同學仔！到最後一棒既時候，佢個位同學可以話毫無壓力，我睇得出佢放慢左腳步都贏出起碼50公尺！

我響看台等到HH返埋黎既時候，都未出得切聲同佢講乜，其他家長（應該係同隊隊員既媽咪們）竟然搶先走埋佢度，搖住佢膊頭咁恭喜佢，並且讚佢話全靠佢跑得咁快，睇唔出四個隊員最矮係佢點知最快係佢... HH通常響呢種情況都唔會無晒儀態，只係好斯文咁報以微笑... HH，叻女！老豆我今勻有晒光采呀！

運動會圓滿結束，HH輕鬆坐響度等攞獎。

企響冠軍台上接受嘉賓頒獎...

...然後黎張合照。

好滿足咁揸住個金牌影番張相（我講緊我！）

擒晚一家人食團年飯，勁有攞牌經驗既孖堂家姐話，原來響4 X 100裡面，四個人跑得最快既通常會被安排跑第二棒咁話wor！