得閒死唔得閒病

有乜野係會令你連live update都做唔到既呢？

就係忙同埋病勒。

由上星期開始，除左一至五返朝十晚六之外，每逢二、四、六同埋日都要教書。二同四就七至十，六就由晏晝兩點教到九點，禮拜日就朝十起一直到傍晚五點！咁既情況會一直到三月20號，連教會都返唔到！

間唔中仲要返下大陸：上個禮拜二至三返左祈福新村做pilot research，之前新年D咳未清，引發D氣管敏感好煩，喉龍好痕，咳到唔爭在去埋個度間祈福醫院睇埋急診。（其實係老細逼我去，唔係佢有心，只係想用我睇症黎research埋人地D服務水平係點jet！）

登記費要12蚊人民幣，有張smart card記低晒你俾左錢未，配咩藥等等，好似幾先進咁。睇完症去攞藥之前埋單就另外再俾112蚊，不過D藥就全部都係國產成藥黎...

D藥食左有些微改善，但係返左香港第二日都係拿拿臨去再睇個耳鼻喉專科。呢個醫生係我不嬲都睇開既，次次感冒未清引發D氣管敏感，睇一次就包攪掂，盛惠600幾蚊！無得claim，都幾肉赤！

繼續忙... 禮拜六再要帶廿零個MBA學生上去，朝早8:30出車...

忙到教會所有工作都幾乎全部要放低唔做住。不過有一樣野忙都唔會停，就係祈禱勒。呢樣野唔單止得閒先祈，忙又祈得，病就更加要祈，仲要記住幫埋D屋企人同弟兄姊妹代禱添。忙呀忙，你吹咩！