Spy Kids 3D
你咪理，話之佢既內容對大人黎講幾咁垃圾無聊，呢D一家大細齊齊睇既公式電影總之就長做長有，今次仲加埋個立體電影既gimmick，點都tum到我用八十蚊買番隻送兩個專睇立睇電影眼鏡既DVD，志在睇下兩隻馬騮戴左上去個樣，但係想我再買同一個導演既《The Adventures of Sharkboy & Lavagirl in 3-D》就咪駛旨意。大女坐響梳化，睇睇下突然走埋部電視度想攪個屏幕D野，認真攪笑！
posted by ablogaday @ 5:18 PM
7 comments
7 Comments:
我跟隊排第二，睇完睇剩借過來比犬兒過下癮得唔得！
得！搵個禮拜日黎我教會崇拜。你一手交還上次隻「有妳終生美麗」，我就一手連眼鏡奉上。屋企仲有乜好牒，唔該帶埋黎！
呢排問人借左套未睇過既第一輯《24》，唔駛愁無野睇...
真係無乜好戲推介，上次話聖誕晚上睇的「受難曲」都末得閒睇！
至於一碟換一碟之大行動真係要搵日至得喇！今個星期日1月1號就唔得閒了，因我要入大嶼山食齋，每年的第一天都會做的事情。都係一種心靈上的安慰、精神上的一種依負而矣（可能又寫白字）！對我來說滿天神佛都唔知信乜好，總之做人但求心安理得、不作損人、害人之念已是我的做人方針了。
有神、冇神對我來說都是感覺不到，很遙遠很遙遠似的，衪好似無乜關照到我。我唔知這種等價交換的觀念是否錯誤，但這種虛無的宗教信仰，既觸不到亦看不見，真是不踏實。
無問題，一牒交一牒行動唔一定要響禮拜。
我都好想知，點解去大嶼山食完齋就可以得到一D心靈上既安慰，實在到覺得精神上可以依附到？但係幾乎全世界都記念同放假既耶穌生日同復活都仲係咁虛無同唔踏實呢下？仲有，細個時你同我都讀過孫中山先生點樣響間廟度打爛個泥菩薩，叫人唔好拜埋晒D由自己一雙手造出黎既偶像（天壇大佛咁大個咪一樣係人手所造）。所以「滿天神佛」呢句話應該改改佢，改為「滿地神佛」：人手所造既偶像全部都係響地上面，響得個天上面既就唔係人造既，況且太空人都上過天啦，佢地都無響個天上邊見到神或者佛，頂多就係1969年首度登陸月球既太空人，美國Apollo 11既岩士唐(Neil Armstrong)同艾得寧(Buzz Aldrin)，佢地引經據典咁話「我觀看你手所造的天，和你所安放的月亮和星星。」（詩篇第八章4節）
觸不到看不見既唔單止係宗教信仰，「空氣」同「風」都係，但係你睇到佢引致既結果，信耶穌都係咁。
咦！小弟又想來個見見證、吹吹水!
其實返到天父那裡去，對我來說並不是為自己的人生找到一個宗教信仰，又或者心靈上有安慰、精神上有依負...而是找著了生命的源頭，做人有依有歸！我就好似一個孤兒仔突然搵番親生老豆咁震撼！在我沒有這個得著之先，我實在攪唔清做人系為乜！
在信主前，有兩句題問最捉動我的心靈 :
Q: 有什麼是我們人眼睛看不見但卻是永遠存在呢？
A:「空氣」同「風」…
Q: 咁你信冥冥中自有主宰嗎？
A: ...我信！
對的，我們人眼睛所看見的事物， 最終不是都衰殘、敗壞嗎！為獨是人眼看不見的卻是永遠存在…
到現在，我確信除了「空氣」同「風」之外，還有聖靈！
UncleMike
Uncle Mike話信神好似孤兒仔搵番老豆咁，又真係好貼切bor!
諗諗下其實無乜野證明而家住響我屋企個兩隻馬騮係我親生女bor! 又無乜野證明我係我而家叫阿爸阿媽個兩位老人家生個bor! 最多咪得張出世紙，一張紙證明得D乜呀？你唔俾我老婆生個兩件老早響醫院俾人攪錯調亂左咩？講到尾咪一樣講個「信」字！信醫院D人無攪錯，信張紙講既野係真既... 除左信呢D所謂客觀既野之外，父母窮一生既心力愛我、湊大我，而家到我又將最好既俾盡兩隻馬騮，個種主觀既「愛」既感受你點都講唔通話係虛無同唔踏實啦掛？「愛」都係觸唔到睇唔到，但係（都係個句）你睇到佢引致既結果。
你用過Photoshop就一定知，人既眼睛其實好渣。刁虫小技已經可以呃到佢啦！對於光佢又只係睇到紅橙黃綠青藍紫七隻色，其它好似紅外光、紫外光等通通睇唔到，好多動物都叻過我地啦！
聖經約翰福音二十章講耶穌復活之後向佢D門徒顯現過，但係有個叫多馬既就唔在場，佢對其他門徒咁講：『「除非我親眼看見他手上的釘痕，用我的指頭探入那釘痕，又用我的手探入他的肋旁，我決不相信。」過了八天，門徒又在屋子裡，多馬也和他們在一起。門戶都關上了。耶穌來了，站在他們中間... 然後對多馬說：「把你的指頭放在這裡，看看我的手吧！伸出你的手來，探探我的肋旁！不要疑惑，只要信！」多馬對他說：「我的主！我的 神！」耶穌說：「你因為看見我才信嗎？那些沒有看見就信的人，是有福的。」』（約廿25-29）
呀晶老兄，我敢肯定你所講住響你屋企個兩隻馬騮係你同LuLu既親生女……點都冇得呃！
UncleMike
Post a Comment
<< Home