新相機與歪師師智叔

2004年頭買既Panasonic Lumix LC43一直係我每日都帶響身既好拍檔（同部PowerBook都無咁親蜜），但係老婆成日問我點解用佢影出黎既相硬係無人地個D咁靚。鬼咩！人地唔係用Canon 400D就係40D！但係響佢不斷既狠批之下部機又用極都唔肯壞，見住農曆新年黎緊，實要影唔少相，唯有買過部新機逼佢下台... 呢部Lumix係我第一部自己攞錢買既數碼相機，係當年讀緊碩士既時候為左做一個cultural analysis既功課買既，為左件功課我走遍港九新界，一次過影左幾百張相，雖然後黎份功課攞A唔知關唔關佢事，但係我養成隨身帶住相機既習慣就肯定關佢事... Anyway，多謝佢幾年黎默默既服事！

響單鏡機我唔會諗既大前題下，巡下豐澤同百老滙、響網上刨左一大渣reviews、最後sortlist剩 Canon既兩部機：一部係賣成四千蚊、功能同質素都超卓、連靚仔外型都無敵既G9；另一部係其貌不揚、功能唔輸蝕、但係無擴展功能、不過就只係賣二千六既SX100。跟住去鋪頭攞上手試玩下兩部機，最後終於扑錘買SX100。其實由4 Megapixels既Lumix傻仔機，到今時今日無論買G9抑或SX100，對我黎講都已經係大躍進。所以呢幾日試機，點影都覺得滿意架啦！下面撼砰冷都係用部新幾影既：

試影微距（LCD上面既pixels影到晒！）...

試影近距兼黃燈下調white balance...

試影夜景..

試影全手動快門同光圈（睇下超執練琴幾投入！禮拜六特登返黎練琴，各位真係要學下佢事奉既認真... 同慳電！）...

試影準備飲食既男男女女，想試下唔用閃燈既街頭snapshots可以點樣發部機既防手震功能... 對住兩位出爐執事都無震，證明防手震功能真係好掂！

其實仲有試拍左640x480 pixels每秒30格既video test，半分鐘已經超過60MB！費事upload上黎Blogger，連埋D無執過兼full resolution既相放晒上Multiply。

飲緊食緊既呢位歪師師智叔見響第一幅相自己唔起眼，影第二幅既時候就算啜住雪條都要搶鏡！（珊瑚攝）

有部新機玩我當然開心，但係更值得開心既係見住歪師師智叔響主耶穌裡面既改變：由我當年同佢做同事、同Account Director響個studio裡面唔俾面吵鑊勁、到四十而立反思人生... 又記得多年無見居然響個基督教講座撞番、當晚即刻響麥記同老婆一齊同佢講耶穌... 後來見佢試返黎教會、過左唔知幾耐收到佢電話話我知佢決志信耶穌、幫佢做初信栽培、睇住佢洗禮... 由吊兒郎當兼自我中心到家下經歷左好多野都無放棄過個信仰... 到肯放低自己，有拖都唔拍住反而陪醫生叔叔遊迪士尼、又會安慰人... 你話有乜可能唔戥佢開心！？讚美神！讚美神！榮耀歸神！榮耀歸神！

禮拜五晚歪師師智叔揸住本《荒漠甘泉》分享佢讀到上帝俾我地經歷痛苦同患難既正面意義。佢話發覺信左耶穌讀左聖經之後，個人境界真係高D，覺得好滿足咁話。歪師師智叔，活生生咁見證左箴言呢句說話：「敬畏耶和華，是智慧的開端；認識至聖者，便是聰明。」（箴九10）

歪師師智叔，我祝願你信仰上繼續成長，繼續投入教會既肢體生活。YCC雖然有好多唔理想既地方，但將來呢度肯定可以俾你好多豐盛既回憶，努力！